feelings

شىء صعب ان الموت يخطف شخص عزيز عليك وكنت بتحبه اوى فتلاقيه فجاه اختفى من حياتك فى الاول مش هتصدق انه مات وهتحاول تكدب على نفسك وتقنع نفسك بغير كده لكن مع مرور الوقت هتقبلها على انها حقيقه مره مش هتقدر للاسف تغيرها وهتبدا تشغل نفسك باللى ينسيك ممكن تصاحب ناس ماكنش ليك اى علاقه بيهم وفى وسط رحلة نسيانك ممكن تجرح ناس كتير من غير ما تحس لغاية ما توصل لمرحله وما تبقاش قادر تستمر كده وتفوق وتندم على اللى عملته فى ناس كتير ماكنش ليهم ذنب وممكن تلاقى نفسك اتغيرت من جواك بجد وما بقتش الانسان اللى انت عرفته زمانوهتستغرب نفسك بس هتتاقلم وتكمل حياتك لكن مش هتنسى ابدا اللى خطفه الموت منك وهتلاقى نفسك كتير قاعد لوحدك ومشتاقله اوى ونفسك تشوفه اوى وتسمع كلامه ونصايحه وكتير هتلاقى نفسك بتقلده فى افكاره وتصرفاته لكن حياتك بتستمر رغم كل شىء


شىء صعب انك تحب انسان وهوه مش حاسس بيك ساعتها هتحاول تلفت انتباهه بكل وسيله ليك ومهما عمل فيك هتغفرله وممكن تحبه وتشتاقله اكتر كمان وبمرور الوقت وتجاهله التام ليك هتنطوى وتتعذب لوحدك من غير كلام ومن غير ما توصله احساسك او عذابك لمجرد انه ما يشفقش عليك لان ساعتها شعور الشفقه هيكون اسوا من الف سكينه يطعنك بيها ولو جرحك او اذاك هتلاقيله برده مبررات وتغفر له لغاية ما توصل لمرحله ما تبقاش قادر تستمر اكتر من كده وتتمرد وتسيبه بدون اى مقدمات وتحاول تنساه لكن ما بتنساش وبتفضل عايش على ذكراه لكن بتكون خلاص وصلت لمرحله ما ينفعش تتنازل اكتر من كده وترجعله مهما اتعذبت فى بعده عنك لكن لو حصل وحس بيك وهوه اللى رجعلك يجيلك احساس وكانك ملكت الدنيا كلها بين ايديك كإن عذابك كله ما كنش ليه وجود قبل كده وتحس انك بتحبه اكتر من الاول الف مره

NANNY