زمان عشان انزل العب مع بنت الجيران لان ماما ماكنتش بترضى ان انا انزل كتير فكنت انا ادخل البلكونه وامسك الهدوم اللى همه ناشرينها وارميها على الحبل بتاعهم عشان كانوا تحتينا فيقوموا نادهيللى عشان انزل اخد الهدوم وانزل اقعد باساعه لغاية ما شافتنى واحده من الجيران كل يوم وانا بعمل كده وقالت لماما وماما راحت قفشانى وانا بوقع الغسيل وخدت علقه .....انما ايه

وان فى تالته ابتدائى كان فى واحده صاحبتى رغايه اوى وكانت بتقعد جنبى وكنت فى يوم مصدعه ومضايقه وكانت هيه عماله تتخانق وتزعق واقولها يابنتى اسكتى مفيش اقولها مصدعه مفيش اقولها والنبى اسكتى مفيش لغاية اخر ما ذهقت رحت رافعه ايدى وبالقلم على وشها وقلتلهل اخرسى وياريتها خرست دى قلبت الدنيا عياط ولمت عليه المدرسه وبرده ماخرستش وريحتنى من الصداع

الساعه

كان عندنا زمان ساعه كبيره وقديمه قوى وكانت بتعمل صوت جامد كل ما تمر ساعه وكان ليها مفتاح او زنبرك كانوا بيدوروه كل فتره ويظبطوها بيه وماكانوش بيخلونى اقرب منها عشان ما اكسرهاش ففى يوم صحيت بدرى من النوم وكان كله نايم وجبت كرسى وطلعت عليه عشان اطول الساعه اصلى كنت قصيره اوى وقعدت العب فى المفتاح وادوره واحرك فى الساعه لغاية ما فجاه لقيتها وقعت فى الارض وعملت صوت جامد اوى وقعدت تعمل الصوت اللى بتعمله كل ما تمر ساعه فرحت جاريه بسرعه واستخبيت تحت السرير اصلى كنت عارفه انهم عرفوا انى دايما بستخبى ورا السرير فغيرت المخبا وقعدوا يدوروا عليه عشان اخد نصيبى من العلقه بس ما لقونيش واختى عشان تنقم منى لانى كنت دايما برخم عليها فضلت مخليانى مستخبيه تحت السرير ساعه وقعدت تخوفنى ان بابا مستنينى وبعد كده اكتشفت ان بابا كان نسى الحكايه بعد 5 دقايق

كوكو والاستاذ

وانا طفله صغيره عندى 3 او 4 سنين كان فى نجار قصادنا وكنت بحبه قوى وكنت بقولله يا اتاذ ويقوللى ياكوكو وعشان الفت انتباهه كنت بمسك لعبى وارميها ادامه من الشباك عشان اقولله ازيك يا استاذ ويقوللى ازيك ياكوكو ويدينى اللعب بتاعتى

معاكسات

وكنت برده احب اعاكس فى التليفون واتصل بالناس واقوللهم انا بطه انتوا مش عارفيننى ولا ايه وممكن اتصل بالنمره 10 مرات ورا بعض لغاية ما مره قعدت اتصل بالسنترال عشان عجبتنى نمرته واتصلوا بالبيت يشتكوا ان فى بنت صغيره بتعاكسهم فى التليفون اسمها بطه ومن ساعتها حرمت معاكسات اللهم الا نص نمر الدليل بس

اترانى فقدت حبيبا يستحق؟ اترانى اضعت من يدى من لن اجد مثله مهما حييت ؟ ايمكن ان يغفر لى ويعود لى؟ ايمكن ان يعود حبه القديم يظللنى ويحمينى مجددا؟ فى وقت حبه احسست بكل المشاعر التى يمكن ان تنتاب اى انسان واحسست بالحب والشغف والخوف والاطمئنان والامان والخجل والغيره والكره نعم اجتمعت كل تلك المتناقضات معا فى آن واحد فقد احببته واحسست بالشغف للقائه والخوف من فقدانه والاطمئنان لوجوده والخجل بمجرد النظر فى عينه وكرهت لحظة فراقنا