واتولدت من جديد ^_^

احم....ممكن نبدا من جديد





ثوانى بس كده ..


احم...اه معاك


انا اسمى ايمان ..


ايه؟...عارف ؟!!


غريبه ..انا جديده هنا..لالا يمكن تشابه اسماء ..انا اعرف واحده كان ليها نفس اسمى وشكلى وصفاتى تقريبا بس دى ماتت يوم ميلادى انا..الله يرحمها بقى




اه يوم ميلادى ..انا بعتبر ان عمرى ووعيى بدا من شهرين اتنين بس..!!!




يعنى بالظبط كمان ساعه هيبقى عندى شهرين ويوم..!!




انا واحده سعيده ..ومن زمان اوى ..حتى فى حياتى اللى فاتت كنت سعيده ..بس ماكنتش مصدقه او ماكنتش عاوزه اصدق...


انا ماعنديش مشاكل خاالص ..مفيش غير شوية كلاكيع صغنطوطه باقيالى من حياتى اللى فاتت دى ومش عارفة اعمل فيها ايه ...






عارف ...انا اول مره فتحت عينى ماكنتش عارفة ان كل حاجه واضحة كده..كان عينى بقت ولا احسن كاميرا جايبة انقى صور للحياة...


ماتستغربش لو قلتلك ده مافرحنيش على اد ما هوا خضنى...اللى هوا قلت يا نهار ابيض ايه ده هوا بجد الدنيا كده وانا مش حاسه ؟!! :D:D








هقولك على حاجة تانية....انا اول مره افتح عينى بجد كانت وانا حاطة راسى ع السجادة بسجد لرب كريم رجعنى للحياة من تانى عشان اشوفها...انا محظوظه ان ربنا بيحبنى وبيدينى فرصة تانيه....








عارف يعنى ايه تفتح عينك وتحس طول اليوم ان قلبك ساجد..خاشع..مؤمن برب مفيش احن منه عليك..!!






عارف يعنى ايه لما تقرا كلامه تحس بدموع بتنزل وبرهبة وخوف وندم وحب وشوق ولهفة وسكينة ورضا ..و كإنك بتتغسل من جوه..






كإنك بتشوف ميلادك بعينيك واى حاجه تانيه بتتمحى وتموت...




كإنك كنت بتجرى بقالك سنين ومش عاوز تقف ..تجيلك عقبات ووقفات وعبر عشان توقفك وانت تتخبط فيها وتكمل ..اه تعبان بس خايف جبان وبرضه بتجرى !!






وفجأه اترميت فى حضن الارض ..وسجدت وبكيت ..واستغفرت ..وهديت وارتحت ..






فجأه بقيت احلى وانقى..بقيت قوى وحاسس انك تقدر تواجه اى حاجة..وفجإه لقيتك اتغيرت....مت واتولدت من جديد ..بفكر جديد ..وقلب جديد




عارف ايه اكتر حاجة كانت مخوفانى ساعتها ...كنت ندمانة وخايفة من عقاب ربنا وكل ما افتكر كلام ربنا وهوا بيقول " يمهل ولا يهمل "




اخاف واندم واقول يارب هتتردلى فى ايه ؟




بس عارف اكتشفت ايه..اكتشفت ان اقسى عقاب هوا اللى انا فيه ده ..الندم اللى بيعصرنى من جوه..صور الحياة اللى ضيعتها ..العمر اللى راح بدون فايدة..احلى واجمل ناس فى حياتى ضيعتها ...آلام الناس اللى بحبها ووجعتها حسيتها..قسوة قلبى وعنادى اتقلب فجأه لوجع بيضربنى كل ليلة وانا بفكر..





ندم وامل فى بكرة..احساس وايمان ان الاوان مافاتش..لسه فيه امل






انا واحده تانيه اتولدت وكبرت واتعلمت على سجادة الصلاة وصوت القرآن







الوقت فجر ..صوت المؤذن من بعيد بيقول حى على الصلاة..حى على الفلاح..الصلاة خير من النوم





افتح عينى




مش سامعة صوت حد ولا حاسة بحاجه


ماسكة المصحف وحاسة بهمس كلمات القرآن وانا برددها بيدخل جوايا..وآية بتتردد جوا صدرى :ألم يأن للذين آمنوا ان تخشع قلوبهم لذكر الله "








ادمع ..وارمى نفسى ع الارض..واقول سامحنى يارب وقربنى منك..ماتخلينيش ابعد عنك تانى ولا استسلم تانى..انا محتاجاك اوى







.....قلبى بيدق جامد وصوت جوايا بيردد كلام ربنا "واذا سألك عبادى عنى فإنى قريب اجيب دعوة الداع اذا دعانى فليستجيبوا لى وليؤمنوا بى لعلهم يرشدون "






......الحمد لله يارب ....وارتاح













هنا خلصت الحكاية...لا يمكن هيا بدأت


الحكاية فصولها كتير وبتتكرر...احنا اللى مش شايفين او مش عايزين نشوف..!!




فطرة الانسان هى الاسلام الصح..لما يرجعلها يعنى الراحة اللى بجد..






انا مبسوطه بجد..ومهما زعلت او احبطت او حصلتلى مشاكل انا راضية عن نفسى طول مانا حاسة انى رضيت ربنا..وهوا معايا انا مش خايفة من حاجة ولا من حد..هيجيبلى الخير فى الاخر..مهما قاسيت الخير مستنينى....









ياارب ..سألتك باسمك الرحمن الرحيم ان تنقذنى من عينى فلا ترينى الاشياء الا بعينك انت ...وتنقذنى من يدى فلا تأخذنى بيدى بل بيدك انت ..تجمعنى بها على من احب عند موقع رضاك فهنالك الحب الحق..وهنالك استطيع ان اقول..لقد اخترت لأنك انت الذى اخترت..وانت الوحيد الذى توثق جميع الاختيارات وتبارك كل الحريات...


انت الحرية..ومنك الحرية..وبك الحرية..


وانت الحب ..ومنك الحب ..وبك الحب..

آمين


^_^

Eman

25-6-2011