احلى الاوقات :)

اكتبى ..قولى اللى جواكى
حتى لو مش حلو طلعى احساسك ع الورق ....
لما سمعت كده فكرت كتير اوى اكتب عن ايه ماوصلتش لحاجة
كنت قاعدة النهاردة مع شخص عزيز عليا كان بيفتكر ذكريات مر بيها سواء كانت سعيدة او لا  بس الحاجات دى خليتنى ابتسم من جوايا ....

حلو اوى انك تأرخ جواك يوم وموقف وتفتكرهم وتقول ان كنت هنا وعملت كده ف يوم وده أثر فيا عشان كده بفتكره ....

معرفش ليه انا مؤمنة ان مش الفكرة اننا نوصل لهدف او مش هيا دى كل حاجة عايشين عشانها لان اللى بيعملنا هوه ذكرياتنا ومواقفنا عشان كده لازم نخلى كل يوم لينا يستحق الذكرى جوانا وجوه اللى حوالينا ........



مفيش اشخاص كتير أثرت فى حياتى ع الاقل بطريقة مباشرة الا فى حاجات محدودة ...
واعتقد ان ده مع سنين عمرى العشرين كارثة ...
وانى ضيعت كتير اوى وما استفدتش من حاجات وناس كتير عدوا عليا وما اهتمتش....

افتكر ان اول حد كان ليه تأثير عليا كان جدى الله يرحمه ..رغم انه اتوفى وانا ف سن صغير جدا لا يتجاوز ال 10 سنين الا انه مازال ليه اعظم تأثير فيا.....

رغم انى للاسف ماكنتش فاهمة ولا كنت عارفة قيمة خبرة الراجل العظيم ده
فاكرة وشه المكرمش العجوز اللى كله طيبة وحنية وحكمة وحزم ف نفس الوقت وهوه بيضحكنى وبيحضنى ..فاكرة اوى ريحة حضنه اللى فضلت متعلقة ف حتة جوايا مش هتروح منها وانى كنت بحس انى مش عاوزه حاجة من الدنيا الا ان لحظة الحب والامان دى تستمر ...
فاكرة ف اخر ايام مرضه انى الوحيدة اللى سمحلها دخل عليه وحاول يقوم عشان بس يشوفها ويدعيلها من قبله ....

فاكرة كرامته وكبريائه وعزة نفسه حتى فى اشد لحظات ضعفه
...فاكرة ايمانه وثقته فى ربنا اللى ملهاش حدود..فاكرة حب ولاده ليه واد ايه رغم تدينه كان راجل متفتح وبيقبل كل جديد....
فاكرة ثقته ببناته اللى ياما اتحكالى عنها بفخر من امى واخواتها ...

اد ايه ندمانة انى ماخدتش جزء من خبراته ..انى ماسمعتلوش وقعدت معاه كل وقتى ....

الله يرحمه ويغفر له ويدخله جناته ويجمعنى معاه يوم الحساب يارب ....

من احلى ذكرياتى ..اول مصروف خدته فى حياتى ..
كان اول ربع جنيه امسكه فى ايدى وحاسة انى شايلة كنز واجرى ف الشارع اقول لكل الناس شوفوا معايا ايه ..:)
اول يوم دراسة والعياط لانى لاول مرة ابعد عن حضن امى ...

اول صاحبة قعدت جنبها وسلفتها مية من الزمزميه بتاعتى :)
فاكرة اول 5 جنيه اخدتها من المدرسة على الشعر وتقديم الاذاعة كل يوم اربع ف ابتدائى :)

فاكرة اول ضربة قلم اديتها لصاحبة عمرى _فى الوقت ده _عشان عصبتنى واحنا بنلعب كوتشينة فى تالتة ابتدائى :D

فاكرة اول مرة غشيت من صاحبتى ف امتحان من تحت التختة :)

فاكرة اول مرة اخويا علمنى الصلاة وانا عمرى 5 سنين وانى كنت بصلى جنبيه وانا بضحك وبعمل باى باى لماما من بعيد :)))))))

فاكرة السنين اللى ماعداش عليا فيها يوم الا وانا بستنى بابا فى الشباك واول ما اشوفه انزل اجرى وانا بزعق عشان اسمع كل العمارة بابا جه ..بابا جه :):)

فاكرة اول مره وقعت وانا بجرى ع السلم عشان افرح ماما انى نجحت فى كى جى 1 وانى جرحت رجلى وقمت وانا مش مهتمة بالالم من كتر فرحتى وان ماما جايتلى ساعتها اكبر علبة بسكوت شفتها ف حياتى ف الوقت ده :):)

فاكرة خوفى من العيل اللى على اول شارعنا اللى كان اصغر منى بكتير وكان بيخطف منى الفلوس واللاكل كل ما اعدى بلطجة :))))))

فاكرة انى كنت بحب اخويا حب جنونى
اخويا اللى علمنى الصلاة قبل ما ادخل المدرسة
اللى علمنى كل الخرايط والقارات قبل ما ادخل المدرسة
اللى مثللى كل التاريخ الاسلامى وفتوحات الاسلام قبل ما اعرف اى حاجة فعليا عن الاسلام :):):)

انى ماكنتش بسمحله يخرج يروح اى مكان الا وانا وراه ع العجلة يجيبلى ايس كريم ..وانه لما سافر المنصوره فى اول سنه ليه فى هندسة كان عندى 7 سنين  وانى كنت بكتبله جوابات كتير بلغة هيروغليفية عجيبة كده وامسك صورته واقلد الافلام وابوسها واقول امتى ترجع يا شريف يا حبيبى :):):)



فاكرة اول فرحة ..واول حزن..واول دقة قلب ..واول صدمة ..واول كدبة ..واول توبة ..واول دعاء من قلبى لربنا .....

فاكرة اول كل حاجة عملت منى ايمان ..اللى مش ندمانة على حاجة الا انها لسة ماجربتش اول مرة فى حاجات كتير ..... :)

كلمة اخيرة :-
الى من دفعنى لكتابة هذا اليوم ...شكرا لانك حررت قيد الحرية بداخلى :)

شكرا لذكرياتى ...شكرا لحياتى
شكرا ل أنا ... لأنها هى أنا ..... :)



Eman
3-3-2012