Posts
واحد من طقوس حياتى اليومية انى اول ماتيجى الساعة 12 بليل اجرى ع النتيجه اللى ع الحيطه واشيل الورقة عشان اقرا الحكمة الموجوده عليها .. وياويله اللى يفكر ف البيت انه يقطعها قبلى ...
عشان كده لما بتخانق مع اخواتى فى البيت احد اساليب الحرب البارده بينى وبينهم انهم يقطعوها قبلى :)))))
معرفش ليه بحس انها موجهة ليا انا وانى فى وقت ما اكون محتاجه حاجه هلاقى فيها كلمة تنورلى طريقى ....
امبارح كنت متضايقة اوى ومخنوقة معرفش ليه .. وماكنتش نايمه بقالى يومين وبرده ماعرفتش انام الا ساعة من كتر مانا متضايقة مع انى كنت تعبانه جدا
استنيت لحد الفجر وقلت اصلى وانام .. وقبل الفجر افتكرت انى ماقطعتش ورقتى بقالى يومين عشان الامتحانات .. رحت جريت وطلعت وقفت ع الكرسى عشان اطولها واقطع ال 3 ورقات
لقيت اول ورقة بتقولى اياك تقطع راى بتؤمن بيه عشان راى الناس اللى حواليك :)
قلت ايه ده ورقتى عرفت ازاى :)؟؟؟
شفت التانيه لقيتها بتقولى ان ربنا شايف وحاسس بكل حاجه بنعملها حتى لو نسينا ده :)
فتحت ورقتى الاخيره والفجر بيأذن حواليا لقيتها بتقولى اذا سجد القلب سجدت معه كل الجوارح :)
عرفت انها ليا .. وليا انا لوحدى :)
صليت الفجر صلاة سجد فيها قلبى وروحى وكل حاجه فيا .. سجدت فيها كل جوارحى :)
كنت حاسه ان ربنا حاسس بيا وشايفنى ف اللحظه دى وانا بقوله ريحنى يارب .. ارضى عنى وقربنى منك حتى لو كنت انا بزعلك منى ساعات كتير .. خليك جنبى دايما يا حبيبى ...
ربنا كان سامعنى اوى وريحنى اوى
ونمت وانا مرتاحه ومبسوطه عشان حسيت بالسكينه والاطمئنان اللى كنت محتاجاهم وعرفت ان ورقتى ماكدبتش عليا وعمرها ماهتكدب ابدا :)
يا ورقتى يا ورقتى يا ترى هتقوليلى ايه النهارده :)
Eman
7/2/2012
