ايه الصح بجد؟؟؟؟؟

ايه اصعب حاجه فى الدنيا؟؟؟
او بمعنى اصح ايه الحاجه اللى تكسرك وماترجعش بعديها زى ماكنت ابدا

انك تتصدم فى نفسك وتحس انك حد بيخدع نفسه اوى بكلام كده ملهوش لزمه..وانك بتكدب وتصدق نفسك بقى وفجاه هتلاقى اللى يديك على دماغك كده ويفوقك...وتحس انك بكده الظالم مش المظلوم

ولا انك تقابل حد تديله كل حاجه..وماتبينش اصلا انك بتدى شئ عشان احساسك ان هوه ده المفروض والصح ادام الناس وادام الشخص ده وانت بتتمنى فى كل لحظه يكون جنبك وحواليك..يكون هوه العمر وهو الحب وهو الحياه وتحلم تكبر جنبيه...وبعد كل اللى عملته يسيبك او يخدعك وتحس ان اللى جوالك كله انهار فى لحظه

ولا انك تحب حد اوى وتديله اوى ولا يهمك حد...تقف ادام الدنيا كلها عشانه...تواجه كل اللى يقولك لا ومش هوه ده..هتتكسر تقول لا ده هوه قوتى...يقولولك انت موهوم بس تكون مصدق ان دى احلى حقيقه فى حياتك...وفجاه تصحى تلاقى كل اللى حواليك بيضحكوا عليك ويقولوا هوه ده العبيط اللى اتصحك عليه بمشاعر وكلام...من الاخر ده كان بياع كلام وللاسف انت اشتريت كلام منه بكل مشاعرك واحساسك...لحد ما بقاش فى قلبك حاجه تديها لحد حتى لنفسك ولا انك تثق فى حد اوى وتديه اوى كل حاجه...تشاركه مشاعرك وكلامك...تبقى عايش يومك معاه...تفتكر ان حياتك وحياته حاجه تخصكوا لوحدكوا...فجاه تلاقى الخاص بقى عام المحظور بقى مسموح...مشاعرك وكلامك مرمى فى كل حته ويامين يشترى يا مين يقول يا مين عاوز يضحك على العبيط اللى مشاعره مش ملكه ولا حياته بقت تخصه

ولا انك تكره حياتك وعيشتك وتبقى مش عاوز تشوف حد..مابقتش قادر تكلم حد...خلاص مابقاش منه فايده...تلاقى نفسك بتشك فى كل نظرات اللى حواليك..ده حب ولا كره ده خوف عليك ولا سخريه..انت القوى ولا الضعيف همه الصح ولا انت....من الاخر انت التايه والمجنون والضعبف فى وقت واحد.....وهتستمر الحكايه....مش فى المواقف دى بس ولا الحكايات دى هتنتهى ولا الناس بتسيب حد فى حاله

تفتكر انهى الاصعب دلوقتى ...انك تفكر ولا الغى عقلك...

ويابنى فكك منى

16/9/2009