كوكو والاستاذ

كوكو دى يا جماعه بنت صغيره بس طبعا عسوله وسكر وكل الناس بتحبها مش همدح فيها اكتر من كده لان ده كلام معروف
.كوكو مش فاكره امتى النجار سكن ادامهم
بس بتقول فتحت عينيه على الدنيا ولقيته ادامى

كوكو دايما كان النجار يصحيها بليل بالدق على الكراسى الللى بيعملها
وكان الدق بتاعه مع اول مره يدق فيها قلبها بالحب
ومن هنا بدا الحب بين كوكو والنجار

يا سلام لما كانت تشوفه ويقوللها ازيك ياكوكو وترد عليه وتقولله الحمد لله يا استاذ

بس كان بيفصل بينهم كتير ، مش السن والكلام الفارغ ده طبعا ،
ايه يعنى انها تكون 4 سنين وهو 40 سنه،
لالالا دى شكليات.اللى كان بيفصل بينهم اسمى من كده
كان3 ادوار كاااامله عشان هى كانت للاسف ساكنه فى التااالت
والاكتر كمان الشباك العاااااااااااالى اللى كانت كوكولازم تجيب كرسى عشان تبص منه وتشوف الاستاذ
وفكرت كوكو فى حل بذكائها المعهود
بقت تجيب اللعب بتاعتها وترميها من الشباك العاااالى ده(قمة العبقريه طبعا).
واد ايه كانت مهمتها صعبه
كانت بتجيب الكرسى الكبييييير وتطلع عليه بعد ما تكون لمت اللعب وترميها وكل ده فى سريه تامه لكن كله عشان الحب يهون
وبرضو الاستاذ يستاهل.
وترمى كوكو اللعب(ال يعنى وقعت منها)
.وفجاه الاستاذ يرفع عينه ويبصلها وهو بيبتسم
وهى طبعا لازم تضحكله
ويقوللها كالعاده ازيك ياكوكو وهى تتنهد وتقولله الحمد لله يا استاذ

ويطلع الاستاذ اللعب لكوكو لحد عندها
وساعتها كان فعلا بيكبر فى نظرها
بقى الاستاذ بحاله يطلعلها اللعب ويطلع كمان 3 ادوار عشانها
لكن الزمن غدر بيهم والاستاذ قفل المحل فجاه وقعدت كوكو مستنيه ان الاستاذ يرجع

ومرت سنين كتيييير كده

واهى كوكو بتكتبلكوا حكايتها وبتتمنى ان حد يقوللها اى اخبار عن الاستاذ او يدلها عن مكانه عشان تساله ايه علاقة اسم ايمان لكوكو
اصل اكيد لييه نظره فلسفيه موضوعيه فى الموضوع ده ده مش اى حد ده الاستاذ
اللى يعرف مكانه يرجى الاتصال ب 016000000555550000